Tokhang at Iba Pang Nanlabang Sanaysay by Vim Nadera

Ikatlo ito sa kung tawagin ay “Terapiya Trilohiya” ni Vim Nadera na unang naglabas ng Gadaling-Noo (2021), isang kalipunan ng mga tula, at Kumusta, 2020? (2022), isang koleksiyon ng mga sanaysay na isinilang sa panahon ng pandemya. Itinuturing itong gamot na personal, kaya politikal din, ng awtor na nakaligtas sa atake sa puso noong 2023. Siya ay aktibong kasaping tagapagtatag ng Filipinas Institute of Translation (FIT) na pinili ang “tokhang” bilang Salita ng Taon noong 2018. Kinalaunan, ang nasabing proyekto ng FIT ay pinaralisa matapos nitong hirangin ang “pandemya” bilang Salita ng Taon noong 2020. Inaasahang ang aklat na ito ay mabubuhay upang ipagpatuloy ang pagsasalaysay bilang anyo ng pagpapagaling.
 
Si Victor Emmanuel Carmelo D. Nadera Jr. ay propesor sa UP Diliman. Kasalukuyan siyang fellow ng UP Institute of Creative Writing (ICW) na pinaglingkuran niya bilang direktor, 2003—2008, habang siya rin ay tagapangulo ng Unyon ng mga Manunulat sa Pilipinas. Bilang makata, ang kaniyang mga tula ay nalathala na sa iba’t ibang antolohiya at natipon na rin sa maraming aklat. Bilang sanaysayista, nailathala na ang kaniyang mga artikulo at pag-aaral. Kolumnista siya ng Hataw, Liwayway, at Rappler na nasa likod ng tagumpay ng sinimulan niyang patimpalak sa pagsulat ng COVIDiona, COVIDagli, at COVIDalit. Itinuturing siyang tagapanguna at nangungunang performance artist o tagapagtanghal ng tula. Festival director siya ng Performatura International Performance Literature Festival ng Cultural Center of the Philippines noong 2015, 2017, 2019, at 2021.
2024/198pp
bookpaper/paperback